2017 сыл түмүгүнэн Үөһээ Бүлүү бөһүөлэгин бастыҥнарын таллылар

    0
    51

    «Үөһээ Бүлүү сэлиэнньэтэ» муниципальнай тэриллии төрөөбүт-үөскээбит төрүт сэлиэнньэбит чэчирии сайдарын туһугар үлэлии, айа-тута сылдьар «Бастыҥтан бастыҥ» үлэһит дьону ааттыыр үгэскэ кубулуйбут тэрээһин быйыл хаһааҥҥытааҕар да чаҕылхайдык буолан ааста.


    Үөрүүлээх түгэҥҥэ ыраахтан-чугастан ыҥырыллан кэлбит ытык-мааны ыалдьыттар, элбэҕи эрэннэрэр ыччаттарбыт, дьоһун-мааны үлэһит, ытык дьоммут кыттыыны ыллылар.

    Ааспыт сыл түмүгүнэн, сэлиэнньэ тупсаҕай көстүүлээх буоларыгар саҥа 2018 сылы көрсө үөрэх тэрилтэлэригэр, чааһынай маҕаһыыннарга, тэрилтэлэргэ, дьиэ кэргэттэргэ, түөлбэлэр икки ардыларыгар «Саҥа дьыллааҕы бастыҥ киэргэтии» күрэх биллэриллибитэ. Ол түмүгүнэн, «Бастыҥ киэргэтиилээх тэлгэһэ» анал аат хаһаайыттарынан Людмила, Вячеслав Сидоровтар дьиэ кэргэттэрэ ааттаннылар, «Бастыҥ саҥа дьыллааҕы Тымныы оҕонньор уонна Хаарчаана» оҥоһук кыайыылаахтарынан Лидия, Анатолий Лыткиннар, «2018 сыл бастыҥ бэлиэтэ» кыайыылаахтарынан Любовь, Иван Семеновтар буоллулар. Түөлбэлэр икки ардыларыгар хаар, муус оҥоһукка күрэх түмүгүнэн дьон сэҥээриитин «Хатыҥнаах» түөлбэ ылла. Ураты, аныгылыы истииллээх киэргэтиилээх түөлбэнэн «Кэлтэгэйдэр», онтон «Бастыҥ Саҥа дьыллааҕы киэргэтиилээх» түөлбэнэн «1-кы Билиилээх» ааттанна.

    Маҕаһыыннар уонна чааһынай тэрилтэлэр икки ардыларыгар күрэх түмүгүнэн, «Бастыҥ, ураты киэргэтиилээх» «Про-фото» тэрилтэ буолла, «Бастыҥ киэргэтиилээх маҕаһыын» үрдүк аатын «Берег» маҕаһыын ылла.

    Үөрэх салаатын тэрилтэлэрин икки ардыларыгар «Бастыҥ Саҥа дьыллааҕы Тымныы оҕонньор уонна Хаарчаана» оҥоһукка «Теремок», «Бастыҥ киэргэтиилээх тэлгэһэнэн» «Ньургуһун» оҕо уһуйаана ааттанна.

    Үөрэх салаатын тэрилтэлэригэр «Бастыҥ киэргэтиилээх тэлгэһэ» 2-с №-дээх М.Т.Егоров аатынан орто оскуола, «Бастыҥ муус оҥоһугунан киэргэтии» кыайыылаахтарынан 1 №-дээх И.Н.Барахов аатынан орто оскуола кэллэктиибэ буоллулар.

    Тэрилтэлэр икки ардыларыгар ыытыллыбыт күрэх түмүгүнэн «Бастыҥ муус оҥоһуктаах тэрилтэ» «Сахатранснефтегаз» Үөһээ Бүлүүтээҕи филиала, «2018 сыл бастыҥ бэлиэтэ» 12-с №-дээх баһаарнай чаас, «Саҥа дьыллааҕы бастыҥ киэргэтии» олох-дьаһах коммунальнай хаһаайыстыба кэллэктииптэрэ тигистилэр.

    Бу кэннэ 2017 сыл түмүгүнэн, сэлиэнньэ социальнай-культурнай олоҕор киллэрбит кылааттарын иһин түөскэ кэтиллэр анал бэлиэлэри СӨ Ил Дархана 2017 сыл ахсынньы 30 күнүнээҕи уурааҕынан СӨ үбүлүөйдээх бэлиэнэн педагогическай үлэ бэтэрээнэ, педагогическай наука кандидата, СӨ үөрэҕириитин туйгуна, Үөһээ Бүлүү сэлиэнньэтин, улууһун бочуоттаах олохтооҕо, «Верхневилюйские славянки» кинигэ ааптара Мария Михайлова, «Дьулуур» уопсастыбаннай түмсүү салайааччыта Зоя Егорова, «Айылгы» уопсастыбаннай түмсүү кыттыылааҕа Людмила Егорова наҕараадаланнылар.

    Үөһээ Бүлүү сэлиэнньэтэ МТ депутаттарын сэбиэтин мунньаҕын 2017 сыл ахсынньы 27 күнүнээҕи 06-04 №-дээх быһаарыытынан «Үөһээ Бүлүү сэлиэнньэтин бочуоттаах олохтооҕо» үрдүк аат «Олох-дьаһах коммунальнай хаһаайыстыба Үөһээ Бүлүүтээҕи филиалын» автотранспортнай хаһаайыстыба начальнигар, СӨ Коммунальнай хаһаайыстыбатын бочуоттаах үлэһитигэр Михаил Андреевка, Россия бочуоттаах донорыгар, СӨ үп-харчы үлэтин туйгунугар Галина Семеноваҕа, Быракаан, Үөдүгэй нэһилиэктэрин бочуоттаах олохтооҕор Людмила Петроваҕа, үрдүкү категориялаах дизайнер учууталыгар Розалия Бурнашеваҕа туттардылар.

    Ааспыт сыл биһиги улууспутугар үгүс тэрээһиннээх, үтүмэн үөрүүлээх ураты сылынан буолан үйэ сааска сүрэхпитигэр хаалла. 2017 сыл түмүгүнэн, бастыҥ үлэлээх, көрдөрүүлээх дьон анал ааттары туттулар.

    Ол курдук, «Бастыҥ эдэр ыччат» республика, улуус эдэр кэскиллээх оһуохайдьыта, өбүгэ үгэһин тарҕатааччы, сэлиэнньэ хапсаҕайдаһан тустууга сүүмэрдэммит хамаандатын чилиэнэ, «Тускул» оҕо киинин дириэктэрэ Андрей Алексеев, «Бастыҥ спортсмен» ХХ-с Үбүлүөйдээх Манчаары оонньууларын хапсаҕайдаһан тустууга муҥутуур кыайыылааҕа, СӨ хапсаҕайдаһан тустууга спорт маастара Увар Тимофеев, «Бастыҥ доруобуйа харыстабылын эйгэтин үлэһитэ» улуустааҕы кииннэммит балыыһа терапевт бырааһа Саргылана Герасимова, «Үөрэҕирии эйгэтин бастыҥ үлэһитэ» Д.С.Спиридонов аатынан 4-с №-дээх орто оскуолатын алын сүһүөх кылаастарын учуутала Надежда Архипова, “Бастыҥ урбаанньыт” полиграфическай өҥөнү оҥоруу киинин салайааччыта Александр Антонов, “Бастыҥ культура үлэһитэ” культура уонна духуобунай сайдыы Департаменын сүрүннүүр исписэлииһэ Индира Федорова, “Бастыҥ уһуйаан иитээччитэ” “Теремок” оҕо уһуйаанын иитээччитэ Вера Макарова, “Бастыҥ үлэлээх түөлбэ” 1-кы Билиилээх түөлбэ (салайааччы Наталья Васильева), “Бастыҥ айылҕа харыстабылын эйгэтин үлэһитэ” Александр Архипов, “Бастыҥ маассабай иһитиннэрии үлэһитэ” “Үөһээ Бүлүү” хаһыат корреспондена Валентина Догоюсова, “Бастыҥ бэрээдэги харыстааһын эйгэтин үлэһитэ” полиция отделын учаастактааҕы боломуочуйалааҕын көмөлөһөөччүтэ Петр Павлов, “Бастыҥ олох-дьаһах коммунальнай хаһаайыстыба үлэһитэ” олох-дьаһах коммунальнай хаһаайыстыба Үөһээ Бүлүүтээҕи филиалын киин учаастагын силиэсэрэ Артемий Руфов, “Бастыҥ салайааччы” олох-дьаһах коммунальнай хаһаайыстыба салайааччыта Василий Николашкин буоллулар. Онтон “Сыл бастыҥ ытык ыала” анал аат Раиса Степановна, Василий Степанович Тимофеевтар дьиэ кэргэттэригэр тиксэн, үөрүүбүт үс бүк үрдээтэ.

    Кыайыылаахтары-хотуулаахтары кырачаан Күннэй Капитонова, биир дойдулаахтарбыт Юрий Гольдеров, Дмитрий Дьячковскай, Владимир Васильев, маны сэргэ, Дьокуускай куораттан “Гулун” үҥкүү ансаамбыллара эҕэрдэлээн, үөрүүлээх түгэни эбии киэргэттилэр.

    Күндү дьонум! Үөһээ Бүлүүбүтүн Сахабыт сиригэр эрэ буолбакка, бүтүн дойдуга тиийэ ааттатаргытыттан киэн туттабыт! Ааспыт 2017 сыл хас биирдии киһиэхэ умнуллубат чыпчааллары үйэ-саас тухары хаалларда, хас биирдиибит сэмэй кылааты киллэристэ. Бу тэтиммитин ыһыктыбакка, үүммүт уонна кэлэр сылларга эбии өрөйөн-чөрөйөн сомоҕолоһуохха!» – диэн бөһүөлэк баһылыга Максим Силигиянов дорҕоонноох этиитинэн бастыҥ түһүлгэ түмүктэннэ.